Канон иной Честному и Животворящему Кресту Господню, глас 4.

Тропарь Креста, глас 1:

Спаси́, Го́споди, лю́ди Твоя́, / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.

Кано́н Честно́му и Животворя́щему Кресту́, [его́же краегране́сие сие́: Кресту́ пригвожде́н Христо́с, пре́лесть разреша́ет. Творе́ние Ио́сифово.] Гла́с 4.

Пе́снь 1

Ирмо́с: Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.

Припев: Слава, Господи, Кресту Твоему Честному.

На Кресте́ распросте́рл еси́ Боже́ственныя дла́ни, Долготерпели́ве, и погиба́ющий ми́р призва́л еси́ к позна́нию держа́вы Твоея́, Ще́дре. Те́мже велича́ем благоутро́бие Твое́. (Дважды)

Слава: Зми́я воздви́гл е́сть Моисе́й, прообразу́я Боже́ственное Твое́ распя́тие, Сло́ве пребезнача́льне, и́мже паде́ ядови́тый зми́й паде́нию Ада́мову хода́тай бы́вый.

И ныне, Богородичен: Ору́жие, я́коже рече́ Симео́н, се́рдце Твое́ про́йде, егда́ ви́дела еси́ Христа́ распина́ема, Де́во Влады́чице, и Еди́наго пробода́ема копие́м. Те́мже рыда́ющи боле́зни претерпе́ла еси́.

Пе́снь 3

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшыя духо́вно утверди́ в Боже́ственней Твое́й сла́ве венце́в сла́вы сподо́би.

Я́ко овча́ на заколе́ние ведя́ху Тя́, Христе́, лю́дие пребеззако́ннии, а́гнца Бо́жия су́ща, и хотя́ща изба́вити о́вцы от во́лка лю́таго, и́хже человеколю́бне возлюби́л еси́. (Дважды)

Слава: Предста́л еси́ судии́ суди́мь непра́ведно, судя́й пра́ведно все́й земли́, и претерпе́л еси́ ударе́ние в лани́ту, свободи́ти мя́ хотя́ порабоще́ннаго, Го́споди, лука́вому мироде́ржцу.

И ныне, Богородичен: Из Тебе́, Де́во, обновле́ние Еве яви́ся вои́стинну, Бо́г пло́тию ражда́ем, и на Кре́ст возвыша́ем, низлага́я бе́сы, Богоблагода́тная Влады́чице.

Седален, глас 8.

Прообража́ше та́йне дре́вле Иису́с Нави́н Креста́ о́браз, / егда́ ру́це простре́ крестови́дне, Спа́се мой, / и ста со́лнце, до́ндеже враги́ низложи́, противостоя́щия Ти, Бо́гу; / ны́не же за́йде, на Кресте́ Тя зря, / и, держа́ву сме́ртную разруши́в, / весь мир совоздви́гл еси́.

Пе́снь 4

Ирмо́с: Неизсле́дный Бо́жий сове́т, е́же от Де́вы воплоще́ния, Тебе́ Вы́шняго, проро́к Авваку́м усмотря́я зовя́ше: сла́ва си́ле Твое́й, Го́споди.

Да отпу́стиши мя́ от у́з грехо́вных, Человеколю́бче, Твое́ю во́лею свя́зан бы́л еси́, и на Кресте́ у́мерл еси́ я́ко злоде́й: сла́ва мно́гому благоутро́бию Твоему́. (Дважды)

Слава: Я́звы претерпе́л еси́, Сло́ве Бо́жий, и поно́сную сме́рть, обезсме́ртствуя существо́ земны́х умерщвле́ное страстьми́: сла́ва мно́гому благоутро́бию Твоему́.

И ныне, Богородичен: Раздра́ся рукописа́ние Ада́мово, копие́м прободе́ну Ти́, Влады́ко, Богоро́дица вопия́ше у Креста́ предстоя́щи, Го́споди, и боле́зненно восклица́ющи.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо Неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, все́м воспева́ющым Тя́ ми́р подава́ющая.

Ви́девшее Тя́, Со́лнца, на Кресте́ простира́ема, со́лнце скры́ лучы́, сия́ти не могу́щее, Тебе́ Спа́се заше́дшу, и просвеща́ющу и́же в нощи́ пре́лести спя́щыя, покланя́ющыяся держа́ве Твое́й. (Дважды)

Слава: Распина́ем за милосе́рдие, Го́споди, и спаса́еши мя́, оцта и же́лчи прие́млеши вкуше́ние, сла́стнаго избавля́я на́с вкуше́ния я́ко бла́г, и́мже прельсти́хомся, и тли́ подпадо́хом.

И ныне, Богородичен: Пло́тию Его́же родила́ Сы́на, Богора́дованная, я́ко ви́де на Дре́ве возвы́шена, пла́чем испо́лнися, и долготерпе́нию Его́ дивля́шеся вои́стинну: те́мже велича́ше Его́ снизхожде́ние.

Пе́снь 6

Ирмо́с: Боже́ственное сие́ и всечестно́е соверша́юще пра́зднество Богому́дрии Богома́тере, прииди́те рука́ми воспле́щим, от Нея́ ро́ждшагося Бо́га сла́вим.

Боле́зньми, я́же претерпе́л еси́ распина́ем, боле́зни уста́вил еси́ челове́честву, и к неболе́зненному житию́ все́х приво́диши, благоутро́бне Го́споди. (Дважды)

Слава: Со́лнца лучы́ скрыва́хуся, церко́вная же све́тлость раздира́шеся, и земля́ тряса́шеся, ка́мение стра́хом распада́шеся, на Кресте́ Зижди́теля зре́ти не могу́ще.

И ныне, Богородичен: Приста́нище бу́ди ми́, Всенепоро́чная, в пучи́не лю́тых пла́вающу, я́же бе́дствующую всю́ тва́рь рождество́м Твои́м, Богороди́тельнице, спасла́ еси́.

Кондак, глас 4:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ нас си́лою Твое́ю, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

Икос:

И́же до тре́тияго Небесе́ восхище́н бысть в рай / и глаго́лы слы́шав неизрече́нныя и Боже́ственныя, / и́хже не леть язы́ки [челове́ческими] глаго́лати, / что Гала́том пи́шет, я́ко рачи́телие Писа́ний прочто́сте и позна́сте: / мне, глаго́лет, хвали́тися да не бу́дет, то́кмо во еди́ном Кресте́ Госпо́дни, / на не́мже, страда́в, уби́ стра́сти. / Того́ у́бо и мы изве́стно держи́м, Крест Госпо́день, хвалу́ вси: / есть бо нам спаси́тельное сие́ Дре́во / oру́жие ми́ра, непобеди́мая побе́да.

Пе́снь 7

Ирмо́с: Не послужи́ша тва́ри Богому́дрии па́че Созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в Госпо́дь и Бо́г благослове́н еси́.

Побежде́н бы́сть сопротивобо́рец, и паде́ся ди́вным паде́нием, возне́сшуся Христу́ на Дре́во, и спасе́ся пре́жде осужде́нный, вопия́ ему́: и́же отце́в Госпо́дь и Бо́г благослове́н еси́. (Дважды)

Слава: Умерщвле́на мя́ Дре́вом оживи́л еси́ на Дре́ве Христе́ уме́рый, и Боже́ственными у́бо ра́нами Твои́ми стру́пы се́рдца моего́ исцели́л еси́: препе́тый отце́в Госпо́дь и Бо́г благослове́н еси́.

И ныне, Богородичен: Неве́ста непоро́чная, пала́та Зижди́теля, земле́ неде́ланная, престо́л огнезра́чен яви́лася еси́, Пречи́стая. Те́мже вопие́м Ти́: ра́дуйся, Пречи́стая Влады́чице, я́же челове́ки обожи́вшая Бо́жиим Твои́м рождество́м.

Пе́снь 8

Ирмо́с: О́троки благочести́выя в пещи́ Рождество́ Богоро́дичо спасло́ е́сть: тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Разреша́еши мя́ от у́з ле́тных, в ле́то безле́тный бы́в, свя́зан же бы́в во́лею, го́рдаго у́зам нереши́мым отсла́л еси́, Влады́ко, и спаса́еши мя́ Кресто́м и стра́стию: те́мже благословлю́ Тя, Христе́, во ве́ки. (Дважды)

Слава: Воздви́гся на Дре́во во́лею, и всю́ тва́рь совоздви́гл еси́, Сло́ве Препе́тый, безнача́льне и неви́диме, и́же нача́ла и вла́сти тьмы́ стра́стию Твое́ю, Христе́, обличи́л еси́: те́мже Тя́ пое́м во вся́ ве́ки.

И ныне, Богородичен: Ви́девши усну́вша на Дре́ве Христа́, все́м бо́дрость подаю́щаго Боже́ственную и спаси́тельную, Ма́ти Всенепоро́чная, восклица́нием рыда́ше и взыва́ше: что́ сие́ нове́йшее чу́до? Оживля́яй вся́, умира́ет хотя́.

Пе́снь 9

Ирмо́с: Вся́к земноро́дный да взыгра́ется Ду́хом просвеща́ем, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Стоя́ше суди́м Человеколю́бче, и́же суди́ти хотя́й все́м: венце́м же терно́вым увя́злся еси́ хоти́тельне, Спа́се, свое́ю во́лею, преслуша́ния, Христе́, те́рния из ко́рене истерза́я, все́м же насажда́я Твоего́ благоутро́бия позна́ние. (Дважды)

Слава: О ка́ко лю́дие беззако́ннии, за́вистию су́ще омраче́ни, пра́ведна су́ща, и непоро́чна Тя́, Светода́вче, Кресту́ предаю́т? Его́же стра́сть со́лнце зря́ помрача́шеся, и све́тлость церко́вная раздира́шеся, и колеба́хуся основа́ния земли́.

И ныне, Богородичен: Просвети́, Чи́стая, любо́вию воспева́ющих и велича́ющих Тя́, разреши́ страсте́й на́ших тьму́, Отрокови́це, укроти́ бу́рю и лука́ваго собла́зны от среды́ отжени́, Ты́, Отрокови́це, моли́твами Твои́ми.

Молитва Честному и Животворящему Кресту

Да воскре́снет Бог, и расточа́тся врази́ Его́, и да бежа́т от лица́ Его́ ненави́дящии Его́. Я́ко исчеза́ет дым, да исче́знут; я́ко та́ет воск от лица́ огня́, та́ко да поги́бнут бе́си от лица́ лю́бящих Бо́га, и зна́менующихся кре́стным зна́мением, и в весе́лии глаго́лющих: ра́дуйся, пречестны́й и животворя́щий Кре́сте Госпо́день, прогоня́яй бе́сы си́лою на тебе́ пропя́таго Го́спода на́шего Иису́са Христа́, во ад сше́дшаго и попра́вшаго си́лу диа́волю, и дарова́вшаго нам тебе́, Крест Свой честны́й, на прогна́ние вся́каго супоста́та. О пречестны́й и животворя́щий Кре́сте Госпо́день, помога́й ми со свято́ю Госпоже́ю Де́вою Богоро́дицею, и со все́ми святы́ми во ве́ки. Ами́нь.